Uzanto:DavidW/eventi2
dum septembro:
50, 100 e 500 yari ante nun …
12 di septembro 1974. Haile Selassie, imperiestro di Etiopia, destronizesis. Ilu naskis, kom Tafari Makonnen, en 1892; il esis heredinto de la dinastio qua decendis de rejulo Salomon e de la rejino di Sheba. En 1916, pos la destronizo di Iyasu la 5ma, Zawditu, onklino de Iyasu, divenis imperiestrino di Etiopia, e Tafari divenis regento, kom Ras Tafari (Princo Tafari). Pos la morto di Zawditu, il kronizesis ye 2 di novembro 1930 kom imperiestro Haile Selassie ("Povo di la Triuneso"). Ilu destronizesis da la armeo di Etiopia en 1974, ed enkarcerigesis en la Granda Palaco. Ilu mortis en 1975.
13 di septembro 1924. En Lyon, Francia, la kompozisto Maurice Jarre naskis. Il originale intencis studiar por divenar injenioro, ma pos kurta periodo en la Universitato di Paris il studiis kompozado e hamonio ye la Konservatorio di Paris. Il pose esis muzikala direktanto di la Théâtre National Populaire, e kompozis muziko por multa dramati di la teatro. Il anke kompozis por plura Franca filmi. Ilua kariero internaciona komencis kande il kompozis por la filmo Lawrence of Arabia, direktata da David Lean en 1962, e pose produktis muziko por la sequanta filmi da Lean, til 1984. La kompozisto Jean-Michel Jarre esas ilua filiulo.
5 di septembro 1524. Vasco da Gama divenis guvernanto di Portugalana India. Il esabis la unesma explorero qua sucesoza voyajis ad India per navo, atingante Kozhikode, ye la marbordo di India, en 1498. Pos la nomineso, sucedante koruptita guvernanto, en februaro 1524, il komencis la voyajo de Portugal en aprilo, kun floto de 14 navi. Quar o kin navi perdesis dum la voyajo. Il arivis en septembro, e remplasis la antea oficisti; tamen, il aquiris malario balde pos la arivo, ed il mortis ye 24 di decembro.